नेपालमा आयोजना हुने तेस्रो संस्करणको साफ यु- १८ च्याम्पियनसीपका लागि नेपालले २३ सदस्यीय राष्ट्रिय फुटबल टोलीको मंगलवार घोषणा गरेको छ । नेपाली टोलीका मुख्य प्रशिक्षक चेतनारायण श्रेष्ठले दोस्रो चरणमा रहेका २५ खेलाडीमध्ये २३ सदस्यीय टोलीको घोषणा गर्नुभएको अखिल नेपाल फुटबल सङ्घ (एन्फा)ले जनाएको छ ।
गोलरक्षक रोहित कार्की र मिडफिल्डर दीपेश गुरुङ भने छनोटबाट बाहिरिनुभएको छ । छनोट भएका खेलाडीमा गोलरक्षक विशाल सुनार, सूर्य अधिकारी र पुजन होना हुनुहुन्छ भने डिफेन्डरमा विशाल बस्नेत, रन्दीप पौडेल, पदम भट्टराई, सुजन शर्मा, नवीन गुरुङ, रोहन दोङ, अलिक रुम्बा र एन्जल महर्जन हुनुहुन्छ ।
त्यसैगरी मिडफिल्डरमा शिशिर लेखी, रोशन रानामगर, आकाश बुढा मगर, जय गुरुङ, मनीष थापा, कौशल फुयाँल र नितिन थापा हुनुहुन्छ भने स्ट्राइकरमा ब्रिजेश चौधरी, साचु गुरुङ, कैलाश लामिछाने, दर्शन गुरुङ र मनीष डाँगी छनोटमा पर्नुभएको छ ।
प्रतियोगितामा नेपाल समूह 'ए'मा रहेको छ । नेपालको समूहमा माल्दिभ्स र भुटान छन् । त्यस्तै, अर्को समूहमा बङ्गलादेश, भारत र श्रीलङ्का छन् । दुवै समूहको शीर्ष दुई टोली सेमिफाइनलमा प्रवेश गर्नेछन् । आगामी असोज ३ देखि १२ गतेसम्म हुने उक्त प्रतियोगिताको खेल हल्चोकस्थित सशस्त्र प्रहरी बल (एपीएफ) मैदानमा हुनेछ ।