लोकसंवाद संवाददाता | पर्यटन | आश्विन १, २०७६
काठमाडौं । पूर्वपर्यटन सचिव सुशील घिमिरेको संयोजकत्वमा नेपाल वायुसेवा निगम सुधारका लागि गठित कार्यदलले २०७६ असाेज १ गते संस्कृति,पर्यटन तथा नागरिक उड्ययन मन्त्री योगेश भट्टराई समक्षा प्रतिवेदन बुझाएकाे छ
मन्त्री योगेश भट्टराईले पूर्वपर्यटन सचिव सुशील घिमिरेको संयोजकत्वमा गठित पाँच सदस्यीय कार्यदल गठन गरेकाे थियाे । कार्यदल सदस्यहरुमा डा. सुवाेधकुमार कर्ण, डिमप्रसाद पाैडेल, सुधिर शम्सेर राई र बुद्धिसागर लामिछाने सदस्य रहनु भएकाे थियाे ।
कार्यदलले प्रतिवेदनमा रणनीतिक साझेदारी भित्र्याएर निगमलाई पब्लिक कम्पनी बनाउन सुझाव दिइएको हो । समितिले निगमको व्यवस्थापनबारे यसअघि तयार पारिएका ६ वटा प्रतिवेदनको समेत अध्ययन गरी नयाँ प्रतिवेदन तयार गरेकाे कार्यदलले जानाकारी दिएकाे छ ।
प्रतिवेदनले निगमलाई पब्लिक कम्पनीमा लैजान र सर्वसाधारणदेखि विभिन्न संस्था/निकायलाई पनि शेयर जारी गर्न समेत सुझाव दिएको छ । रणनीतिक साझेदारीमा नजानु तथा राजनीतिक नियुक्ति निगमको समस्याको मूल जड भएको प्रतिवेदनले औँल्याएको छ । राजनीतिक नियुक्ति नै निगमको समस्याको मुल जड रहेको तथ्य अध्ययनबाट देखिएको छ,’ प्रतिवेदन बुझाउँदै समिति संयोजक घिमिरेले जानकारी दिनुभयाे ।
पब्लिक कम्पनी बनाउनेसहितका दीर्घकालीन सुझाव पनि प्रतिवेदनले दिएको छ । प्रतिवेदन बुझ्दै मन्त्री भट्टराईले तोकिएको समयमै प्रतिवेदन तयार पारेकोमा समितिलाई धन्यवाद दिनुभयो । गत साउन २२ गते मन्त्रीस्तरीय निर्णयबाट गठित समितिले काम सुरु गरेको एक महिनामा प्रतिवेदन बुझाएको हो । सो अवसरमा मन्त्री भट्टराईले प्रतिस्पर्धी बजारमा निगमलाई नाफामा लान प्रतिवेदनले सुझाएका उपायले सहयोग गर्ने बताउनु भयो ।
मन्त्री भट्टराईले ‘सार्वजनिक कम्पनी मोडलमा लान दिएको सुझाव आवश्यक कानुनी प्रक्रिया पूरा गरेर कार्यान्वयन गरिने' जानकारी दिनुभयाे ।