जोर्डनमा जारी एएफसी यु- १६ च्याम्पियनसीप छनोटअन्तर्गत नेपालले आज तेस्रो खेल ताजिकिस्तानसँग खेल्दै छ । जोर्डनको जार्का सिटीस्थित प्रिन्स मोहम्मद अन्तर्राष्ट्रिय रङ्गशालामा नेपालले जीत निकाल्ने उद्देश्यका साथ बलियो प्रतिद्वन्द्वी ताजकिस्तानको सामना गर्दै छ ।
खेल नेपाली समयअनुसार राती १०ः४५ बजे हुनेछ । यसअघि खेलेको अघिल्ला दुई खेलमा नेपालले एक अंक जोडेको छ । पहिलो खेलमा घरेलु टोली जोर्डनसँग नेपाल ७–० गोल अन्तरले पराजित भएको थियो । यद्यपि, दोस्रो खेलमा भने नेपालले खेलमा पुनरागमन गर्दै कुवेतलाई १–१ गोलको बराबरीमा रोकेको थियो । यसअघि समान दुई खेल नै खेलेको ताजिकिस्तान दुवै खेलमा जीत हासिल गर्दै ६ अङ्क जोडेको छ ।
उक्त छनोट च्याम्पियनसीपमा विभिन्न ४८ वटा राष्ट्र सहभागी छन्, जसलाई ११ समूहमा विभाजन गरिएको छ । नेपाल समूह 'ए'मा परेको छ । नेपालको समूहमा आयोजक जोर्डनसँगै कुवेत, ताजकिस्तान र श्रीलङ्का छन् । जारी प्रतियोगितामा ताजिकिस्तान शीर्ष स्थानमा छ भने जोर्डन दोस्रो स्थानमा छ । ४ अंकका साथ कुवेत तेस्रो स्थानमा छ भने १ अंक बटुलेको नेपाल चौथो स्थानमा छ ।
तीन खेल खेलेको श्रीलङ्का तीनै खेलमा पराजय भोग्दै अंक तालिकाको पुछारमा छ । प्रतियोगिताको शीर्ष टोलीले सन् २०२० मा आयोजना हुने च्याम्पियनसीपको दोस्रो चरणमा स्थान बनाउनेछन् ।