साताको पहिलो दिन दोहोरो अङ्कले घटेको नेप्से परिसूचक सोमवार भने झिनो अङ्कले बढेको छ । नेपाल स्टक एक्सचेन्जका अनुसार शेयर कारोबार मापक नेप्से परिसूचक १.७३ अङ्कले बढेर एक हजार १४०.९८ मा पुगेको छ । यस्तै, सेन्सेटिभ परिसूचक ०.१० अङ्कले बढेर २४९.८१ मा पुगेको छ । परिसूचक बढे पनि कारोबार भने अत्यन्त न्यून रह्यो ।
आज कुल १७० कम्पनीको सात लाख ४३ हजार ३१५ कित्ता शेयर १७ करोड ७२ लाख ७९ हजार ०३९ रुपैयाँमा खरिद बिक्री भयो । कारोबार भएका कुल १२ मध्ये नौ उपसमूहको शेयर बढेको छ भने तीन उपसमूहको शेयर ओरालो लागेको छ । बैंकिङ ०.४४, व्यापार ८.१८, होटल २.२७, विकास बैंक २.७६, निर्जीवन बीमा ८.३५, उत्पादन ८.४५, अन्य ३.९५, लघुवित्त ३.७९ र जीवन बीमा १६.५९ अङ्कले बढे । त्यस्तै, जलविद्युत् ०.६८, वित्त ०.१७ र सामूहिक लगानी कोष ०.०६ अङ्कले घटे ।
स्टकका अनुसार कारोबार रकमका आधारमा प्रभु बैंक शीर्ष स्थानमा रह्यो । सो बैंकको शेयर एक करोड २५ लाख २३ हजार ४४७ रुपैयाँमा खरिद बिक्री भयो । त्यसैगरी शिवम् सिमेन्ट एक करोड २० लाख ५२ हजार ५०३, सिद्धार्थ बैंक ८५ लाख २८ हजार ७३३, नेपाल लाइफ इन्स्योरेन्स कम्पनी ८३ लाख २६ हजार ९७८, कृषि विकास बैंक ७१ लाख ३२ हजार ४१३ र नेपाल बङ्गलादेश बैंक लिमिटेडको शेयर ५९ लाख ६८ हजार ५०० रुपैयाँमा खरिद बिक्री भई शीर्ष स्थानमा रह्यो ।
परिसूचक बढे पनि युनियन हाइड्रो पावरका शेयधनीले ३.७७ प्रतिशतले गुमाए । यसैगरी माउन्टेन हाइड्रो नेपाल ३.७०, आँखुखोला जलविद्युत् कम्पनी ३.४४, ग्लोबल आईएमई समुन्नत स्किम–१ को ३.३६ र पञ्चकन्या माई हाइड्रोपावर कम्पनीका शेयरधनीले ३.२६ प्रतिशतले गुमाए । साल्ट ट्रेडिङ कर्पोरेसनका लगानीकर्ताले ४.९४ प्रतिशतले कमाउँदा सिर्जना फाइनान्स वित्तीय संस्था ३.९०, जोशी हाइड्रो पावर डेभलपमेन्ट ३.५१, साइन रेसुङ्गा डेभलपमेन्ट बैंक ३.२७ र हिमालयन पावर पार्टनरका लगानीकर्ताले ३.०८ प्रतिशतले कमाए ।