अविरल वर्षाले तिब्बतको खासा बजार नजिक रमिते भन्ने ठाउँमा सडकको बीच भागमा करिव डेढ सय मिटर चर्किएपछि तातोपानी नाका बन्द भएको छ । सीमा पुलबाट सात किलोमिटरमाथि रहेको सो सडकमा चिनियाँ प्राविधिक टोलीले निरीक्षण गरी मर्मत कार्य सुरु गरिएकाले आठ-दश दिनसम्मका लागि बन्द हुने भोटेकोसी गाउँपालिकाका अध्यक्ष राजकुमार पौडेलले जानकारी दिनुभयो ।
सडक बन्द भएकाले मर्मत गरी पुनः सञ्चालन हुन १० दिन लाग्ने जानकारी पाएको तोतोपानी भन्सार कार्यालयका भन्सार अधिकृत तथा सूचना अधिकारी केशव वलीले बताउनुभयो । सो नाका भएर आउन लागेका मालवाहक कन्टेनर भ्यानहरू पनि सडक बन्द भएपछि केरुङतर्फ फर्काइएको अध्यक्ष पौडेलले जानकारी दिनुभयो ।
यस नाकाबाट भूकम्पपछि यस पालाको बडादशैँका लागि करिव ५० हजार भेडाच्याङ्ग्रा भित्रिने भएका छन् । भेडाच्याङ्ग्रा लिन सात-आठ टोली तिब्बत गइसकेकाले अबको तीन-चार दिनपछि तातोपानीमा आइपुग्ने व्यापारीहरूले बताएका छन् ।