अल्जेरियाको सैनिक अदालतले पूर्वराष्ट्रपति अब्देलाजिज बौतेलिफाका भाइलाई १५ वर्षको जेल सजाय दिएको छ । सन् २०१३ मा राष्ट्रपति बौतेलिफालाई हृदयाघात भएर सख्त बिरामी भएपछि उहाँका भाइ सइद बौतेलिफाले राज्यका सम्पूर्ण कामकारबाही सम्हाल्नुभएको थियो ।
सइद बौतेलिफासहित गुप्तचर निकायका दुई जना पूर्वप्रमुखलाई सुनुवाइका लागि सोमवार सैनिक अदालतमा पेस गरिएको थियो । झण्डै दुई दशक सत्तामा रहेका पूर्वराष्ट्रपति बौतेलिफाको शासनकालमा भएका भ्रष्टाचार र शक्तिको दुरूपयोगका बारेमा हाल अल्जेरियाका विभिन्न अदालतमा मुद्दा चलिरहेका छन् । यी मुद्दाहरू खासगरी पूर्वराष्ट्रपतिसँग नजिक रहेका उच्च पदस्थ कर्मचारी र राजनीतिक नेताहरूमा केन्द्रित छ ।
पूर्वराष्ट्रपति बौतेलिफाले जनताले गरेको लगातारको प्रदर्शनपछि राजीनामा दिनुभएको थियो । सैनिक अदालतमा सरकारी अभियोजनकर्ताहरूले पूर्वराष्ट्रपतिका भाइसहित चार जनामाथि २० वर्षसम्मको जेल सजायका लागि माग गरे पनि अदालतले १५ वर्ष कायम गरेको थियो ।