अन्तर्राष्ट्रिय क्रिकेट परिषद् (आईसीसी)ले सार्वजनिक गरेको टी-ट्वान्टी क्रिकेटको नयाँ वरीयतामा नेपालका कप्तान पारस खड्का २७औँ स्थानमा रहनुभएको छ । आईसीसीले बिहीवार सार्वजनिक गरेको नयाँ वरीयतामा कप्तान खड्कासँगै वसन्त रेग्मी र सोमपाल कामी पनि पर्नुभएको छ ।
नेपाली राष्ट्रिय क्रिकेट टोलीका कप्तान रहनुभएका खड्का अलराउन्डरतर्फ २७औँ स्थानमा यथावत् रहन्भएको हो । कप्तान खड्काले ९० रेटिङ अंक पाउनुभएको छ । उहाँ दुई महिनाअघि २५औँ स्थानमा हुनुहुन्थ्यो ।
त्यस्तै, ब्याटिङतर्फ भने कप्तान खड्का ६६औँ स्थानमा हुनुहुन्छ । बलिङमा नेपाली टोलीका सदस्य रेग्मी ४११ रेटिङ पाउँदै ७३औँ स्थानमा पुग्नुभएको छ भने कामी ३९१ रेटिङ पाउँदै ७८औँ स्थानमा झर्नुभएको छ ।
त्यस्तै, अलराउन्डरतर्फ सोमपाल ६७औँ स्थानमा यथावत् रहनुभएको छ । उहाँले ४९ रेटिङ अंक पाउनुभएको छ । आईसीसीको टोलीमा टी-ट्वान्टी वरीयतामा नेपाल ११औँ स्थानमा यथावत् रहेको छ भने एक दिवसीय वारीयतामा नेपाल १७औँ स्थानमा रहेको छ ।