लोकसंवाद संवाददाता | विदेश | आश्विन १०, २०७६
एजेंसी । राष्ट्रपति डोनल्ड ट्रम्प र युक्रेनी राष्ट्रपतिबीच भएको टेलिफोन कुराकानीको विवरण लुकाउने कार्य वाइट हाउसका अधिकारीले गरेको आरोप लागेको छ।
अमेरिकी राष्ट्रपतिविरूद्ध लागेको उजुरीमा यस्तो आरोप लगाइएको छ । आरोपमा भनिएको छ- राष्ट्रपति ट्रम्पले युक्रेनी राष्ट्रपतिमाथि जो बाइडनविरुद्ध अनुसन्धान गर्न दबाव दिएका थिए।
सार्वजनिक भएको पछिल्लो उजुरीमा भनिएको छ, दुइजना राष्ट्र प्रमुख बीच भएको फोन संवादको प्रतिलिपि नियमित कम्प्युटर प्रणालीमा राखिएको छैन । त्यसको सट्टा विशेष प्रकारको सूचनाको निम्ति प्रयोग हुने बेग्लै कम्प्युटर प्रणालीमा त्यो राखिएको छ ।
अमेरिकाको तल्लो सदनकी डेमोक्र्याट सदस्य न्यान्सी पेलोसीले रिपब्लिकन राष्ट्रपति ट्रम्पविरुद्ध महाभियोगको औपचारिक अनुसन्धान अघि बढाएको जानकारी छन् ।
उनले राष्ट्रपति ट्रम्पमाथि जो बाइडनको छवि धमिल्याउन सहयोग गरेको आरोप लगाएकी छन्। बाइडन सन् २०२० मा हुन लागेको राष्ट्रपतीय चुनावमा डेमोक्र्याटिक पार्टीको तर्फबाट उम्मेदवार बन्ने दौडको अग्रपङ्क्तिमा छन्।