इङ्लिस प्रिमियर लिगको प्रतिष्ठित फुटबल क्लब म्यान्चेस्टर युनाइटेडका मुख्य प्रशिक्षक ओले गुन्नार सोल्सजारले चालू सत्रमै अग्रपंक्तिका खेलाडी भित्र्याउन लागिपरेको बताउनुभएको छ । टिमका अनुभवी खेलाडी रोमेलु लुकाकु र अलेक्सिस सान्चेज टिमबाट बाहिरिएसँगै म्यान्चेस्टरको अग्रपंक्ति कमजोर बनेको छ ।
प्रशिक्षक सोल्सजारले क्लबमा प्रतिभाशाली खेलाडी भए पनि पछिल्ला केही खेलमा गोल गर्न नसकिएको भन्दै अग्रपंक्तिका खेलाडी भित्र्याउनेतर्फ विचार विमर्श थालिएको जानकारी दिनुभयो । उहाँले खेलामा केही नयाँपन ल्याउन चाहेका र केही लामो समयको करारमा खेलाडी भित्र्याउन खोजेको बताउनुभयो ।
म्यान्चेस्टर युनाइटेडले युभेन्टसका मारियो मान्जुकी र पाउलो डिबाला, बोरुसिया डर्टमन्डका जाडोन सान्चो र एथ्लेटिक बिल्बाओका इनाकी विलियम्सलाई ल्याउन प्रयास गरिरहेको छ । युनाइटेड हाल प्रिमियर लिगमा ११औँ स्थानमा छ । सोमबार युनाइटेडको खेल आर्सनलसँग हुँदै छ ।
