धितोपत्र बजारमा शेयर कारोबार मापक नेप्से परिसूचक मंगलवार पनि दोहोरो अङ्कले बढेको छ । नेपाल स्टक एक्सचेञ्जका अनुसार कारोबार मापक नेप्से १०.१३ विन्दुले बढेर एक हजार १४५.६९ विन्दुले बढेको छ । यस्तै, सेन्सेटिभ परिसूचक ३.१९ विन्दुले बढेर २५०.२१ विन्दुमा पुगेको छ ।
नेप्से उकालो लाग्दा कारोबार रकममा समेत सामान्य वृद्धि भएको छ । कुल १६४ कम्पनीको कुल १३ लाख ८६ हजार २८ कित्ता शेयर ३१ करोड १४ लाख ८८ हजार ६५२ रुपैयाँमा खरिद बिक्री भए । स्टकका अनुसार कारोबार भएका कुल ११ उपसमूहमध्ये आज तीन उपसमूहको शेयर ओरालो लागेको छ । होटल ७.९३, उत्पादन ५२.९२ र सामूहिक लगानी कोष ०.०१ विन्दुले घटेका छन् । यस्तै, बैंकिङ १२.८१, विकास बैंक ३.८४, जलविद्युत् ५.१८, वित्त ९.६८, निर्जीवन बीमा ४९.१२, अन्य ९.१२, लघुवित्त ११.२९ र जीवन बीमा १६.६१ विन्दुले बढेको छ ।
कारोबारका आधारमा आज नेपाल बङ्गलादेश बैंकको संस्थापक शेयर शीर्ष स्थानमा रहेको छ । सो बैंकको सात करोड एक लाख २५ हजार रुपैयाँ कारोबार भई शीर्ष स्थानमा रहेको छ । यस्तै, शिवम् सिमेन्टको चार करोड ३० लाख तीन हजार ५१७, नेपाल इन्भेस्टमेन्ट बैंकको संस्थापक शेयर तीन करोड ३१ लाख ८७ हजार ९९६, मेगा बैंक एक करोड ३४ लाख ९७ हजार २७३, नेपाल दूरसञ्चार कम्पनी एक करोड २९ लाख ५० हजार ८०५, हिमालयन डिस्टिलरी एक करोड ६ लाख ८७ हजार ७२० र सिद्धार्थ बैंक ९५ लाख २७ हजार रुपैयाँमा कारोबार भई शीर्ष स्थानमा रहे ।
यस्तै, कारोबारका आधारमा सिनर्जी पावरका लगानीकर्ताले ६.८५, युनियन फाइनान्स ६.५९, रिलायन्स फाइनान्स ६.३६, माहुली सामुदायिक लघुवित्त वित्तीय संस्थाका शेयरधनीले ६ प्रतिशतले कमाए । सप्तकोसी डेभलपमेन्ट बैंक ९.०९, शिवम् सिमेन्ट ५.४५, ओरियन्टल होटल ३.११, मल्टीपर्पोज फाइनान्स कम्पनी ३, साञ्जेन जलविद्युत् कम्पनी २.८७, र तिनाउ मिशन डेभलपमेन्ट बैंकका शेयरधनीले २.५८ विन्दुले गुमाए ।
