भारतको फिल्मी शहर भनेर चिनिने मुम्बईमा गान्धी चलचित्र महोत्सव ‘गान्धी फिल्म फेस्टिबल’ आयोजना गरिने भएको छ । भारतका राष्ट्रपिताका रूपमा मानिने महात्मा गान्धीको १५०औँ जन्म जयन्तीको अवसर पारेर यही अक्टोबर २ देखि ६ सम्म मुम्बईमा ‘गान्धी फिल्म फेस्टिबल’ आयोजना गर्न लागिएको हो ।
उक्त फेस्टिबलमा महात्मा गान्धीसँग सम्बन्धित चलचित्रहरू राखिनेछन् । श्याम बेनेगलको ‘द मेकिङ अफ महात्मा’, रिचार्ड एटेनबर्गको 'गान्धी', ‘‘गान्धी माई फादरलगायतका केही चलचित्रहरू उक्त प्रदर्शनीमा राखिने भएको महोत्सव आयोजकहरूले जानकारी दिएका छन् । यी दुई चलचित्र राष्ट्रिय चलचित्र विकास संस्थानद्वारा उत्पादित चलचित्रहरू हुन् ।
त्यसैगरी अर्काे चलचित्र ‘गान्धी माई फादर’को निर्देशन फिरोज अब्बास खाँले गर्नुभएको हो । महात्मा गान्धी नामबाट सुपरिचित मोहनदास करमचन्द गान्धीलाई भारतका राष्ट्रपिताका रूपमा त्यहाँ सम्मान गरिन्छ । उहाँले भारतमा राज गरिरहेका वेलायत सरकारका विरुद्धमा संघर्ष गरेर भारतलाई बेलायती साम्राज्यवादबाट मुक्त गराउन उल्लेखनीय भूमिका निर्वाह गर्नुभएको थियो । उहाँले त्यस समयमा शक्तिशाली हतियार र ठूलो सैन्य शक्ति रहेको बेलायती साम्राज्यलाई पनि विना हातहतियार शान्तिपूर्ण रूपमा क्रान्ति गरेर भारतबाट बेलायती शासकलाई लखेट्न सक्नेगरी भारतीय स्वतन्त्रता आन्दोलनको नेतृत्व प्रदान गर्नुभएको थियो ।
उहाँको त्यो अहिंसात्मक र शान्तिपूर्ण आन्दोलनबाट भारतका मात्र नभएर विश्वकै शान्तिप्रेमी र प्रजातन्त्रमा आस्था राख्ने नागरिकलाई ठूलो प्रेरणा मिलेको थियो । ‘गान्धी माई फादर’ फिल्ममा महात्मा गान्धीको भूमिका खेल्नुभएका वरिष्ठ कलाकार श्री दर्शन जरिवाला उक्त महोत्सवको प्रमुख अतिथिका रूपमा रहनुहुने बताइएको छ । भोलि बुधबारदेखि हुन लागेको यो महोत्सवमा सबै सर्वसाधारणलाई पनि खुला गरिएको आयोजकहरूले जनाएका छन् ।