अमेरिकी प्रतिबन्धका कारण इन्धनको अभाव झेलिरहेको क्युबाका विदेशमन्त्री ब्रुनो रोड्रिगेजले इन्धनको बदलामा मुलुकको स्वाभिमानको सौदाबाजी गर्न नसक्ने बताउनुभएको छ । ट्विटरमार्फत् एक टिप्पणी सार्वजनिक गर्दै विदेशमन्त्री रोड्रिगेजले क्युबामाथि आर्थिक, व्यापारिक र वित्तीय प्रतिबन्ध लगाउने अमेरिकी प्रशासनको रबैयाको कडा शब्दमा निन्दा एवं भर्त्सना गर्नुभयो ।
उहाँले क्युबामाथिका प्रतिबन्धहरू मानव अधिकारको गम्भीर उल्लंघन भएको बताउनुभयो । रोड्रिगेजका अनुसार अमेरिकामा राष्ट्रपतीय चुनाव हुने वर्षमा क्युबामाथि अनावश्यक दबाब दिइने गरिएको छ । सन् १९५९ को क्युबा विद्रोहपश्चात् भागेर अमेरिकाको मियामी पुगेका ठूलो संख्याका क्युबालीको दबाबमा भोटको आस गर्दै क्युबामाथि दबाब दिने गरेको क्युबाली सरकारको भनाइ छ ।
तर, विदेशमन्त्री रोड्रिगेजले अमेरिकीहरूको सोचाइ पुरातन शैलीको छ भन्दै अमेरिकामै रहेबसेका ठूलो संख्याका क्युबालीले दुवै देशबीच सम्बन्ध सुधार भएको हेर्न चाहिरहेको बताउनुभयो ।