जापान सरकारले सम्राट नारुहितोको शुभराज्याभिषेक समारोह स्थगित गर्नेतर्फ विचार गरिरहेको जापानको सरकारी टेलिभिजन एनएचकेले बिहीबार जनाएको छ ।
'हागिबिस' नाम दिइएको आँधीका कारण जापानमा व्यापक जनधनको क्षति भएकाले निर्धारित मितिमा शुभराज्याभिषेक हुन कठिन रहेको सरकारी अधिकारीहरूको भनाइ उद्धृत गर्दै एनएचकेले समाचार प्रसारण गरेको छ । आँधीका कारण ८० जना बढीको मृत्यु भएको छ भने अरू केही व्यक्ति अझै बेपत्ता छन् । सरकारले खोज तथा उद्धारको कार्य जारी राखेको छ ।
जापान सरकारले यही अक्टोबर २२ का लागि शुभराज्यभिषेकको मिति तय गरेको थियो । राज्यभिषेकका अवसरमा विदेशी विशिष्ट पाहुनाहरूलाई आमन्त्रण गरिएको छ । एनएचकेका अनुसार अहिले सरकारको मुख्य प्राथमिकता नै राहत र उद्धारमा केन्द्रित रहेकाले अक्टोबर २२ को कार्यक्रम स्थगित गर्न सरकारले तयारी गरिरहेको छ ।
एएफपीले उक्त विषयमा शुभराज्यभिषेक आयोजक समितिसँग राखेको जिज्ञासामा यसबारेमा केही निर्णय भई नसकेकाले केही बताउन नसकिने जनाएका छन् । जापानी सम्राट अकिहितोले राजगद्दी परित्याग गरेपछि छोरा नारुहितोलाई गत वर्ष जापानी सम्राट घोषणा गरिएको थियो ।