पूर्वी युरोपको क्रोएसियाका विभिन्न शहरहरूमा यौनहिंसाका विरुद्ध हजारौँले प्रदर्शन गरेका छन् । उनीहरूले यौनहिंसा गर्नेलाई दोषी ठहर गर्नुपर्ने माग गर्दै शनिबार प्रदर्शन गरेको अधिकारीहरूले आइतबार जानकारी दिएका छन् ।
महिला अधिकारवादीहरूको समूहले आयोजना गरेको प्रदर्शनमा सहभागी प्रदर्शनकारीले 'महिलालाई न्याय दे, दोषीलाई कारबाही गर' भन्दै नारा लगाएका थिए । यसै महिनाको सुरुमा जाडारमा पाँच युवाको समूहले १५ वर्षीया एक युवतीलाई बलात्कार गरेको समाचार सार्वजनिक भएको थियो । अदालतले दोषी आरोपी सबैलाई अनुसन्धानका लागि ३० दिन थुनामा राख्न आदेश दिएको अधिकारीहरूले जनाएका छन् ।
उनीहरूलाई पर्याप्त अनुसन्धान गर्न र दोषी पाइए सख्त कारबाही गर्न माग गर्दै हजारौँ महिला अधिकारवादी तथा आफन्तहरूले शनिबार राजधानी जाग्रेबको मध्यभागमा प्रदर्शन गरेका थिए । प्रदर्शनकरीले 'दोषीलाई कारबाही नहुनु आफैँमा अर्को अपराध हो' लेखिएको व्यानर पनि प्रदर्शन गरेका थिए ।
प्रदर्शनका आयोजकहरूले कानुनको शासन कायम गर्न पनि माग गरेका छन् । उनीहरूले यस मुद्दालाई अर्को अदालतमा लैजानुपर्नेमा जोड दिएका छन् ।
