लोकसंवाद संवाददाता | कारोबार | कार्तिक ६, २०७६
माेरङ । विराटनगर भन्सार कार्यालयले चालू आर्थिक वर्षको पहिलो तीन महीनाको अवधिमा कूल आठ अर्ब ९९ करोड ३८ लाख नौ हजार राजश्व सङ्कलन गरेको जनाएको छ ।
यो उठेकाे राजश्व राखिएकाे लक्ष्यको तुलनामा चार अर्ब ९४ करोड ९३ लाख ५० हजारले कमी हो । उक्त अवधिका लागि विराटनगर भन्सार कार्यालयलाई कूल १३ अर्ब ९४ करोड ३१ लाख ५९ हजार राजश्व सङ्कलन गर्ने लक्ष्य तोकिएको थियो । गत वर्ष सोही अवधिमा १० अर्ब पाँच करोड २९ लाख ९५ हजार राजश्व सङ्कलन भएको थियो । गत आर्थिक वर्षको तुलनामा चालू आर्थिक वर्षको पहिलो तीन महिनामा रु एक अर्ब ५७ करोड ५६ लाख ४० हजार राजश्व कम उठेको विराटनगर भन्सार कार्यालयका भन्सार अधिकृत मणिराम पौडेलले जानकारी दिनुभयो ।
चालू आवमा सङ्कलित राजश्वमा भन्सार महशुलतर्फ तीन अर्ब ३५ करोड ९६ लाख ८९ हजार, मूल्यअभिवृद्धि करतर्फ चार अर्ब ४२ करोड १४ लाख ६७ हजार र अन्तःशुल्कतर्फ ६९ करोड ६२ लाख रहेको थियाे । गएको वर्षमा सो अवधिमा भन्सार महशुल चार अर्ब ४३ करोड ६० लाख तीन हजार, मूल्यअभिवृद्धि कर पाँच अर्ब २२ करोड ३८ लाख ४८ हजार र अन्तःशुल्क ६९ करोड ३१ लाख ४५ हजार राजश्व सङ्कलन गरेको विराटनगर भन्सार कार्यालयले जनाएको छ ।
भन्सार असुलीको प्रगति हेर्दा चालू आवको साउन महीनामा ६८ दशमलव १० प्रतिशत, भदौ महीनामा ६५ दशमलव ९९ प्रतिशत र असोज महीनामा ४९ दशमलव ७६ प्रतिशत भएको कार्यालयले जनाएको छ ।