पोखरामा अन्तर्राष्ट्रियस्तरको ‘द कासाङ्गा’ च्यालेन्ज आयोजना हुने भएको छ । नेपाल एसोसिएसन अफ र्याफटिङ एजेन्सी (नारा)गण्डकी प्रदेश पोखराको आयोजनामा यही कात्तिक ८ र ९ गते प्रतियोगिता गर्न लागिएको नारा गण्डकीका अध्यक्ष वीरेन्द्र लामाले बताउनुभयो ।
पुरुष र महिला गरी दुई विधामा हुने प्रतियोगिताअन्तर्गत पोखराको हल्लनचोकदेखि याम्दी दोभानसम्म साढे सात किलोमिटर साइक्लिङ, याम्दी दोभानदेखि मर्दीखोला दोभानसम्मको साढे छ किलोमिटर दूरीमा दौड तथा मर्दी खोला दोभानदेखि याम्दी दोभानसम्म आठ किलोमिटर दूरीमा रिभर रेस कायाकिङ गरिनेछ ।
प्रतियोगितामा प्रथम पुरस्कार एक लाख, द्वितीय ५० हजार र तेस्रो हुनेले २५ हजार रुपैयाँ पुरस्कार प्राप्त गर्ने नाराका निर्वतमान अध्यक्ष निमबहादुर मगरले जानकारी दिनुभयो । साइक्लिङ र रनिङ दुवै विधामा प्रथम, द्वितीय र तृतीयले ३० हजार, २० हजार र १० हजार रुपैयाँ पुरस्कार प्राप्त गर्नेछन् ।
प्रतियोगितामा नेपालसहित क्यानडा, भारत, अस्ट्रेलिया, बेलायत, अर्जेन्टिना, अष्ट्रिया, फ्रान्स, जर्मनी, स्वीट्जरल्याण्ड, न्यूजिल्याण्ड, जापानका गरी करिब २०० प्रतिष्पर्धीको सहभागिता रहने आयोजकले जनाएको छ ।
