रूपक श्रेष्ठको गजल
कार्तिक १६, २०७६

तिम्रो अभावमा म त आधा भएछु 
मेरो जिन्दगीको म नै बाधा भएछु

रंगिएथेँ अंगअंगमा रङहरूमा तिम्रै
उडेछन् सब रङ अब त साधा भएछु

चलाएँ तीर अनि फेरि पिलाएँ पानी 
म आफै शिकार आफैँ ब्याधा भएछु

म खोक्रो बाँसुरी हुँ तिमी धून मेरो
म धून-प्यासी विरही राधा भएछु 

कवि, प्रेमी र पागल उस्तै हुन् भन्छन् 
म प्रेममा पागल अलिक ज्यादा भएछु ।


युरोपमा रहनुभएका श्रेष्ठ नेपाली साहित्यका विविध विधामा कलम चलाउनुहुन्छ ।