इंग्ल्यान्डको मेरिलेबोन क्रिकेट क्लब (एमसीसी)ले नेपाली राष्ट्रिय क्रिकेट टोलीसामु २०२ रनको लक्ष्य प्रस्ततु गरेको छ । कीर्तिपुरस्थित त्रिवि क्रिकेट मैदानमा मंगलवार टस जितेर ब्याटिङ गर्दै एमसीसीले ३९.२ ओभरमा सबै विकेट गुमाउँदै २०१ रनको योगफल बनायो ।
एमसीसीका लागि विल रोड्स र बिली गोडलम्यानले अर्धशतक बनाए । रोड्सले ५४ रन तथा गोडलम्यानले ५२ रन बनाए । यस्तै, विल भान्डरस्परले ३६, कोलुम ज्याकनले ११, एलेक्स थमसनले ११ तथा टम वेस्लेले १० रनको योगदान दिए ।
बलिङतर्फ नेपालका लागि पवन सर्राफ र ललित राजवंशीले चार/चार विकेट लिए । अविनास बोहरा र करण केसीले एक/एक विकेट लिए । नेपालले अहिले जवाफी ब्याटिङ गरिरहेको छ ।
नेपाल भ्रमणमा रहेको एमसीसीको यो दोस्रो खेल हो । आइतवार सम्पन्न पहिलो खेलमा एमसीसीले १९ वर्षमुनिको राष्ट्रिय क्रिकेट टोलीलाई ३८ रनले पराजित गरेको थियो ।
