साताको पहिलो दिन करिब सात अङ्कले ओरालो लागेको धितोपत्र बजारमा शेयर कारोबार मापक नेप्से परिसूचक सोमवार भने झिनो अङ्कले उकालो लागेको छ । नेपाल स्टक एक्सचेन्जका अनुसार नेप्से ०.९७ बिन्दुले बढेर एक हजार १४०.२६ मा पुगेको छ । यस्तै, सेन्सेटिभ परिसूचक ०.०४ अङ्कले बढेर २५०.५१ मा पुगेको छ ।
नेप्से झिनो अङ्कले बढ्दा कारोबार रकम भने आइतवारको तुलनामा केही वृद्धि भएको छ । कुल १६३ कम्पनीको सात लाख ५९ हजार ७१२ कित्ता शेयर १९ करोड १८ लाख ५४ हजार ३३३ रुपैयाँमा खरिद बिक्री भए । आइतवार १६१ कम्पनीको सात लाख ८४ हजार ७४० कित्ता शेयर १७ करोड ५५ लाख ४४ हजार ४७२ रुपैयाँमा खरिद बिक्री भएको थियो । स्टकका अनुसार कारोबार भएका कुल ११ उपसमूहमध्ये सात उपसमूहको शेयर उकालो लागेको छ भने चार उपसमूहको शेयर घटेका छन् ।
बैंकिङ ०.९२, विकास बैंक ०.८३, फाइनान्स १ र अन्य उपसमूह २.४६ बिन्दुले घट्दा होटल ५.६३, जलविद्युत् १७.४३, निर्जीवन बीमा १४.३८, उत्पादन ०.९६, लघुवित्त ५.६, जीवनबीमा ३.०३ र सामूहिक लगानी कोष ०.०६ बिन्दुले बढेको छ । कारोबार रकमका आधारमा नविल बैंक शीर्ष स्थानमा रहेको छ ।
आइतवार आर्थिक वर्ष २०७५/०७६ को मुनाफाबाट ३४ प्रतिशत लाभांश दिने घोषणा गरेको सो बैंकको शेयर आज एक करोड ९८ लाख ८६ हजार ४५३ रुपैयाँमा खरिद बिक्री भयो । प्रभु बैंक एक करोड ६१ लाख ५३ हजार ५९२, चिलिमे जलविद्युत् कम्पनी एक करोड १९ लाख ५३ हजार ८२९, प्राइम कमर्सियल बैंक ९२ लाख ४६ हजार, नेपाल बैंक लिमिटेड ७० लाख ३१ हजार २६४ र कृषि विकास बैंक ५७ लाख २० हजार ७५२ रुपैयाँ बराबरको कारोबार भई शीर्ष स्थानमा रहे ।
स्टकका अनुसार ग्लोबल आईएमई लघुवित्त वित्तीय संस्थाका शेयरधनीले ९.९३ प्रतिशतले कमाउँदा चिलिमे जलविद्युत् कम्पनी ६.२४, नेरुडे लघुवित्त विकास बैंक ५.६९, एनआईसी एसिया ग्रोथ फण्ड ५.४७ र हाइड्रो इलेक्ट्रिसिटी एण्ड इन्भेष्टमेन्ट एण्ड डेभलपमेन्ट कम्पनीका लगानीकर्ताले ४.५५ प्रतिशतले कमाए ।
यस्तै, जोशी हाइड्रोपावर ४.८३, गुर्खाज फाइनान्स ४.३४, माउन्टेन हाइड्रो ३.७५, अरुण भ्याली हाइड्रोपावर ३.०६ र एनएलजी इन्स्योरेन्स कम्पनीका शेयरधनीले २.६५ प्रतिशतले गुमाए ।
