धितोपत्र बजारमा कारोबार मापक नेप्से परिसूचक मंगलवार पुनः ओरालो लागेको छ । सोमवार झिनो अङ्कले बढेको परिसूचक आज भने सोही लयमा घटेको छ । नेपाल स्टक एक्सचेन्जका अनुसार नेप्से परिसूचक ०.८१ विन्दुले घटेर एक हजार १३९.४५ मा पुगेको छ । त्यस्तै, सेन्सेटिभ परिसूचक ०.३९ ले घटेर २५०.१२ मा पुगेको छ ।
झिनो अङ्कले नेप्से ओरालो लागे पनि कारोबार रकममा भने आइतवार र सोमवारको तुलनामा सुधार देखिएको छ । कुल १६२ कम्पनीको १० लाख ५८ हजार ८९६ कित्ता शेयर २८ करोड ४४ लाख ७२ हजार ५०१ रुपैयाँमा खरिद बिक्री भयो । कारोबार भएका कुल १२ उपसमूहमध्ये चार उपसमूहको शेयर उकालो लाग्दा सात उपसमूहको शेयर ओरालो लागेको छ भने एक उपसमूह भने तटस्थ देखिएको छ ।
स्टकका अनुसार बैंकिङ ०.४, उत्पादन १६.५२, लघुवित्त १ र सामूहिक लगानी कोष ०.१७ अङ्कले बढ्दा व्यापार उपसमूह तटस्थ रह्यो । यस्तै, होटल ६.३९, विकास बैंक ०.५२, जलविद्युत् ३.२, फाइनान्स ३.५७, निर्जीवन बीमा २८.३३, अन्य ३.०५ र जीवन बीमा १४.९६ विन्दुले घटेका छन् ।
कारोबार रकमका आधारमा प्रभु बैंकको संस्थापक शेयर शीर्ष स्थानमा रहेको छ । सो बैंकको तीन करोड ९४ लाख २३ हजार २४ रुपैयाँ बराबरको कारोबार भई शीर्ष स्थानमा रह्यो । यस्तै, साल्ट ट्रेडिङ कर्पोरेसनको दुई करोड ६३ लाख २० हजार, प्रभु बैंकको एक करोड ५६ लाख ४५ हजार ७७५, एभरेष्ट बैंकको एक करोड ४६ लाख ४६ हजार ४३५, नबिल बैंकको एक करोड २४ लाख ७४ हजार १२५ र मुक्तिनाथ विकास बैंकको संस्थापक शेयर ९२ लाख रुपैयाँमा कारोबार भई शीर्ष स्थानमा रहे ।
स्टकका अनुसार ग्लोबल आईएमई सम्मुन्नत स्किम- १ का शेयरधनीले १० प्रतिशत, सिभिल लघुवित्त वित्तीय संस्था ५.६२, नयाँ नेपाल लघुवित्त विकास बैंक ५.०७, ग्लोबल आईएमई लघुवित्त वित्तीय संस्था ४.८२, गुडविल फाइनान्स ४.५८ र हिमालयन डिष्टिलरीका लगानीकर्ताले ३.९९ प्रतिशतले कमाए ।
यस्तै, सिनर्जी पावरका लगानीकर्ताले १० प्रतिशत, दिव्यश्वरी हाइड्रोपावर ५.७६, रिलायन्स फाइनान्स ५.०४, नेसनल हाइड्रोपावर ३.७७, आँखुखोला जलविद्युत् कम्पनी ३.६३, सिर्जना फाइनान्स ३.१५ र कर्णाली डेभलपमेन्ट बैंकका शेयरधनीले २.९७ प्रतिशतले गुमाए ।
