अफगानिस्तानको उत्तरी प्रान्त तखारको दर्काद जिल्लामा लुकेर बसेका तालिबान लडाकुविरुद्ध अफगान सेनाले गरेको सुरक्षा कारबाहीमा कम्तीमा १२ तालिबान लडाकु मारिएका छन् ।
लडाकू विमानले तालिबानलाई लक्ष्य गरी उक्त कारबाही गरेको प्रान्तीय सरकारका प्रवक्ता मोहमद जवाद हजारीले मङ्गलबार बताउनुभएको छ । यस हवाई कारबाहीमा अन्य पाँच लडाकु घाइते भएका पनि जानकारी दिइएको छ ।
यस क्रममा सुरक्षाबल र सर्वसाधारणतर्फ भने कुनै हताहत भएको खबर प्राप्त भएको छैन । अफगानिस्तानको राजधानी काबुलबाट २४५ किलोमिटर उत्तरमा पर्ने तखार प्रान्तमा सक्रिय तालिबान लडाकु समूहले यस कारबाहीका विषयमा औपचारिक रूपमा कुनै टिप्पणी गरेको छैन ।