‘तराई, पहाड, हिमालको उत्सव नेपाली चलचित्रको स्वर्णिम महोत्सव’ भन्ने मूल नाराका साथ बिहीवारदेखि वीरगंजमा सुरु हुने तीन दिने नेपाली चलचित्र महोत्सव आकर्षणको विषय बन्दै गएको छ ।
नेपाल चलचित्र निर्माता सङ्घले चलचित्र महोत्सवको ५३औँ वर्ष पूरा भएको उपलक्ष्यमा सो महोत्सव आयोजना गर्न लागेको हो । महोत्सवमा नेपाली भाषामा बनाइएका लोकप्रिय चलचित्र, नेपालमै निर्माण गरिएका भोजपुरी भाषाका चलचित्र गरी छ चलचित्र प्रदर्शन गरिने आयोजक समितिका संयोजक विमल पौडेलले जानकारी दिनुभयो । उहाँले भन्नुभयो, 'यो महोत्सवले तराई–मधेसमा लुकेर बसेका पात्रलाई मूलधारमा ल्याउनेछ ।'
नेपालीभाषी चलचित्रले तराई–मधेसमा वर्चस्व कायम राख्न नसकेको अवस्थामा दर्शकलाई चलचित्रभित्रका सांस्कृतिक पक्षबारे जानकारी गराउन महोत्सवले महत्त्वपूर्ण भूमिका निर्वाह गर्नेे प्रचार प्रसार समितिका संयोजक दिलीपराज कार्कीले बताउनुभयो । उपत्यकाबाहिर पहिलो पटक यस आर्थिक नगरमा हुन लागेको महोत्सवले स्थानीय कला, संस्कृति र भाषाको विकासमा टेवा पुग्नाका साथै भारतीय लोकप्रिय कलाकार गोविन्दासमेत सहभागी हुने भएकाले पनि यस क्षेत्रको पर्यटन प्रवर्द्धनमा सहयोग पुग्ने अपेक्षा वीरगंज उद्योग वाणिज्य सङ्घका अध्यक्ष गोपाल केडियाले गर्नुभयो ।
महोत्सवमा नेपाली चलचित्रका पुराना अभिनेता, अभिनेत्रीहरू शिव श्रेष्ठ, भुवन केसी, राजेश हमाल, नीर शाह, करिश्मा मानन्धर, गौरी मल्ल, निरुता सिंहदेखि नयाँ पुस्ताका अनमोल केसी, प्रदीप खड्का, पल शाह, केकी अधिकारी, साम्राज्ञीराज्यलक्ष्मी शाहलगायत नेपाली चलचित्रसँग जोडिएका अन्य विधाका हस्तीको पनि सहभागिता हुने उपसंयोजक हरि पन्तले बताउनुभयो ।
स्थानीय प्रसाशनले महोत्सवमा सहभागी हुन आउने नेपाल तथा भारतका कलाकारको सुरक्षाको व्यवस्था गरेको छ। एक करोड २० लाख रुपैयाँ खर्च हुने अनुमान गरिएको सो महोत्सवका लागि प्रदेश २ सरकारले १० लाख, वीरगंज महानगरपालिकाले १५ लाख र प्रादेशिक पर्यटन प्रवर्द्धन समितिलेसमेत केही रकम उपलब्ध गराएको बताइएको छ ।