अमेरिकाको टेक्सास राज्यमा बुधवार एक गोरा अतिवादीलाई मृत्युदण्ड दिइएको छ । टेक्सासको एल पासो नजिक सन् २००२ मा एक २९ वर्षीया महिलाको हत्यामा दोषी ठहरिएका ३८ वर्षीय जस्टेन हललाई मृत्युदण्ड दिइएको जेल अधिकारीले बताएका छन् ।
अभियुक्त हलले न्यू मेक्सिको नजिकको मरुभूमिमा ती हत्या गरिएकी महिलाको शव गाडेका थिए । 'आर्यन सर्कल' नामको समूह (ग्याङ)ले चलाएको लागुऔषध उत्पादन प्रयोगशालाका बारेमा प्रहरीलाई खबर दिने धम्की दिएपछि हलले ती महिलाको हत्या गरेको सरकारी वकिलले बताएका छन् । हलका वकिलहरूले मानसिक अस्वस्थताका कारण हलले ती महिलाको हत्या गरेको भन्दै माफी दिन अदालत समक्ष पटक पटक आग्रह गरेका थिए तर हल स्वयंले सन् २०१७ मा अदालतमा पुनः सुनुवाइका लागि आवेदन नगर्न वकिलहरूलाई आग्रह गरेका थिए ।
संयुक्त राज्य अमेरिकामा यसै वर्ष मृत्युदण्ड दिइएका हल १९औँ व्यक्ति हुन् । तीमध्ये आठ जनालाई टेक्सासमा मृत्युदण्ड दिइएको छ ।