अमेरिकी राष्ट्रपति डोनाल्ड ट्रम्पले अर्को साता टर्कीका राष्ट्रपति रिसेप तायिप एर्डोगानले वासिङ्टनको भ्रमण गर्नुहुने बताउनुभएको छ । दुवै मुलुकबीच पछिल्लो समय बढेको तीक्तता र कूटनीतिक सम्बन्धमा आएको चिसोपनाका कारण टर्कीका राष्ट्रपतिको अमेरिका भ्रमणमा अन्योल बढेको थियो ।
अमेरिकी राष्ट्रपति ट्रम्पले बुधवार ट्विट गर्दै टर्कीका राष्ट्रपतिसँग टेलिफोनमा निकै राम्रो छलफल भएको जानकारी दिनुभएको छ । उहाँले ह्वाइट हाउसमा एर्डोगानसँग आगामी नोभेम्बर १३ मा भेटवार्ता हुने बताउनुभयो । 'सिरियासँगको सीमा, आतंकवादको निर्मूलन, कुर्दहरूसँगको तनाब समाप्ति तथा अरू धेरै विषयमा हामीबीच भलाकुसारी भए', ट्रम्पले भन्नुभएको छ ।
उहाँले उत्तरी सिरियामा उत्पन्न गतिरोधका कारण त्यस क्षेत्रमा बन्दी बनाइएका इस्लामिक स्टेट्सका केही लडाकुहरू भागे पनि उनीहरूलाई पुनः पक्राउ गरिएको टर्कीका राष्ट्रपति एर्डोगानले जानकारी गराउनुभएको पनि बताउनुभयो । टर्कीले सिरियाभित्र प्रवेश गरी आक्रमण गरेपछि टर्कीविरुद्ध आर्थिक नाकाबन्दी लगाउने भन्दै अमेरिकी संसदले विधेयक पारित गरेपछि टर्कीका राष्ट्रपतिले अमेरिका भ्रमण गर्ने वा नगर्ने अन्योल बढेको थियो ।
