आन्तरिक तथा बाह्य पर्यटक प्रवर्द्धनका लागि सिन्धुपाल्चोकको भोटेकोसी नदीमा अन्तर्राष्ट्रिय स्तरको ‘१८औँ हिमालयन ह्वाइटवाटर च्यालेन्ज- २०१९’ प्रतियोगिता हुने भएको छ ।
नेपाल एसोसिएसन अफ र्याफ्टिङ एजेन्सिज (नारा)को आयोजनामा आगामी मङ्सिर १० देखि १२ गतेसम्म भोटेकोसी नदीमा ‘हिमालयन ह्वाइटवाटर च्यालेन्ज- २०१९’ अन्तर्गत र्याफ्टिङ र कायक प्रतियोगिता हुन लागेको हो । नाराका अध्यक्ष गङ्गाप्रसाद नेपालले हरेक वर्षझैँ यस वर्ष पनि नाराले कायक र कर्पोरेट र्याफ्टिङ रेस प्रतियोगिता आयोजना गर्न लागेको जानकारी दिनुभयो ।
यातायातको सहजता, भौगोलिक निकटता, खोलाको अवस्था तथा विभिन्न प्राविधिक कारणले यस वर्ष भोटेकोसीमा यस्तो प्रतियोगिता गर्न लागिएको अध्यक्ष नेपालले बताउनुभयो । नाराले गत वर्ष लमजुङको मर्स्याङ्दी नदीमा कायक तथा र्याफ्टिङ रेसको प्रतियोगिता आयोजना गरेको थियो । प्रतियोगितामा सालोलम, बोटर क्रस र डाउन रिभर रेस गरी तीन विधामा कायक प्रतियोगिता तथा कर्पोरेट हाउसलाई सहभागिता गराएर एक विधामा समूहगत र्याफ्टिङ रेस प्रतियोगिता हुनेछ ।
कर्पोरेट र्याफ्टिङ रेस प्रतियोगितामा भाग लिने टोलीलाई ७५ हजार रुपैयाँ दर्ता शुल्क लाग्ने नाराले जनाएको छ । र्याफ्टिङ रेस प्रतियोगितामा प्रथम हुने समूहलाई एक लाख, दोस्रो हुनेलाई ५० हजार तथा तेस्रो हुनेलाई २५ हजार रुपैयाँ नगद, प्रशंसापत्र र मेडल प्रदान गरिनेछ ।
यस्तै, कायकतर्फ दर्ता शुल्क विदेशी खेलाडीलाई पाँच हजार ५०० र स्वदेशी खेलाडीलाई तीन हजार रुपैयाँ लाग्नेछ । तीनै प्रकारका कायकमा प्रथम, द्वितीय र तृतीय हुने खेलाडीलाई क्रमशः ५० हजार, ३० हजार र २० हजार रुपैयाँ नगद, मेडल र प्रमाणपत्र वितरण गरिने नाराका महासचिव शिशिर खनालले जानकारी दिनुभयो ।
प्रतियोगितामा स्वदेश तथा विदेशका झण्डै ४०० खेलाडीको सहभागिता रहनेछ । सरकारले नेपाल भ्रमण वर्ष, २०२० सफल बनाउन लिएको उद्देश्यअनुरूप विदेशी पर्यटक नेपाल भित्र्याउन नेपालको साहसिक जलयात्रा व्यवसायलाई विश्व बजारमा प्रचार प्रसार र प्रवर्द्धन गर्नुपर्ने महासचिव खनालको भनाइ छ ।
सन् २००२ बाट कायक र र्याफ्टिङ प्रतियोगिता गराउँदै आएको नाराले पछिल्लो समय विदेशी खेलाडीलाई समेत आमन्त्रण गरेर प्रतियोगिता सञ्चालन गर्दै आएको छ । यस वर्ष विदेशी ३० भन्दा बढी खेलाडीको सहभागिता हुने विश्वास नाराले लिइएको छ । प्रतियोगिता सम्पन्न गर्नका लागि झण्डै ७० लाख रुपैयाँ खर्च हुने नाराले जनाएको छ ।