मैले प्राण आहुति गर्न मिल्छ कि मिल्दैन ?
कार्तिक ३०, २०७६

सरकार !
म टाढा भएको हुँ तर मेरी आमाको 
अस्मिता लुटिएको हेर्ने हिम्मत छैन
मेरा कालापानी, लिपुलेक अनि सुस्ता गुमाएको छैन 
आवाज मैले उठाउँदा सरकार !
म नेपाली हुनेछु, आप्रवासी होइन 
सरकारले मलाई 
न घरको न घाटको परिभाषित गरे पनि 
मेरो देशको नक्सा बदिलिएपछि
मलाई यो स्वीकार्य छैन ।

म मेरो राहदानी, नागरिकता अनि फाइदा हेरेर होइन 
मेरो सीमा, अस्तित्व अनि पुर्खाको इज्जतका लागि लड्नेछु 
मेरो ज्यान, प्राणको मतलब छैन मलाई  
भनिदेऊ सरकार ! 
म सीमामा ढलेँ भने मलाई भिसा मिल्छ कि मिल्दैन ?
मेरो चाहत मेरा पुर्खाकको काखमा बिलाउने छ
भनिदेऊ सरकार ! 
मेरो अस्तुलाई भिसा मिल्छ कि मिल्दैन ?
मेरी आमाको च्यातिएको चोलो सिलाउने 
मेरो रहर पुग्छ कि पुग्दैन ?

म मरेँ भने मेरा सन्तानले  
बाउ खेलेको आँगन खोजे भने
नाबालकलाई प्रवेशाज्ञा  मिल्छ कि मिल्दैन ?

महापुरुष रामले 
आफ्नै ससुरालका सीमा मिच्न मिल्छ कि मिल्दैन ?
महाभारतको लडाइँ जस्तै आफन्तलाई 
दाउमा राख्न मिल्छ कि मिल्दैन ?
मैले मेरो जन्मभूमिको सीमा अतिक्रमणविरुद्ध 
खुकुरी बोक्न मिल्छ कि मिल्दैन ?

राष्ट्रलाई चाहिएमा मेरो प्राण  
आहुति गर्न मिल्छ कि मिल्दैन ?


लेखक फ्रान्समा बसोबास गर्नुहुन्छ र रक्तदान अभियान्ता हुनुहुन्छ