धनप्रसाद सुवेदी | साहित्य | पुष १९, २०७६
आहाल बनेको छ
माइतीघर सडकमा
त्यही आहालमाथिबाट
घनश्यामहरू चिल्ला गाडीमा हुइँकिन्छन्
अनि सिंहदरबारभित्र पस्छन्
मन्त्रीको गाडी चढ्न नपाएका
र सिंहदरबारको कुर्सी नभेटेका
अरु घनश्यामहरू
कहिले माइतीघर मण्डलामा रोइरहेका
किसानलाई हेर्छन् र चुकचुकाउँछन्
कहिले सिंहदरबार छिरिरहने
झन्डाबाल चिल्ला गाडी हेरेर
घुटुक्क थुक निल्छन्
सिंहदरबारको कुर्सीमा पुग्ने
अनेक बाटाहरु छन्
नेताकहाँ धाउने,
....दूतावासतिर छिर्ने
चर्का भाषण गर्ने
र किताब लेख्ने
किसानको आँसुले
किताब लेख्ने राम्रो खुराक मिल्छ तिनीहरूलाई
सडकका घनश्यामहरू
अब समाजवादको किताब लेख्छन्
सम्भव छ-
अर्को साल
किसानहरू
यसरी नै माइतीघरमा रुँदै गर्दा
पर्यटन बोर्डमा समाजवादका किताबहरू विमोचन हुनेछन्
र फेरि अर्को वर्ष
सडकका घनश्यामहरू
किसानका आँसुको दहमाथि झन्डाबाल कारमा हुइँकिने छन्
त्यतिबेला
मन्त्रीच्यूत घनश्यामहरू
माइतीघर मण्डलाको
किसानको धर्नास्थलको सभामा
किसानको पक्षमा
चर्को भाषण गरिरहेका हुनेछन्
र छेवैमा हुनेछ-
'समाजवाद सम्बन्धी किताब बिक्री कक्ष'