लोकसंवाद संवाददाता | समाचार | फाल्गुन १६, २०७५
ताप्लेजुङ । हेलिकप्टर दुर्घटनामा परी निधन भएका संस्कृति, पर्यटन तथा नागरिक उड्डयनमन्त्री रविवन्द्रप्रसाद अधिकारीसहित सात जनाको शव काठमाडौं पठाउन समस्या भएको छ। शव सुकेटार विमानस्थल पुर्याएको केही समयपछि पानी र हिमपातसँगै आकाशमा कालो बादल मडारिएपछि शव पठाउन समस्या भएको हो ।
दुर्घटनामा परी निधन भएकामध्ये तीनको शव बिहान सुकेटार एयरपोर्टसम्म ल्याइएको थियो। घटनास्थलबाट हिजो राति चार शव सुकेटार ल्याइएको थियो ।
प्रमुख जिल्ला अधिकारी अनुज भण्डारीले वर्षा र हिमपातसँगै बादलले आकाश ढाकेपछि शव काठमाडौं पठाउन समस्या भएको बताउनुभयो । मौसम झन् बिग्रदै गएकाले शव पठाउने समय अनिश्चित बनेको उहाँको भनाइ छ ।
यसअघि वर्षा र हिमपातका कारण चिसो बढेपछि हेलिकप्टरबाट शव झार्न र एकीकृत गर्न समेत समस्या भएको थियो।
बुधवार मध्यान्ह ताप्लेजुङको पाथीभरा मन्दिर क्षेत्र आसपास हेलिकप्टर दुर्घटना भएको थियो ।