लोकसंवाद संवाददाता | कारोबार | फाल्गुन २४, २०७६
मकवानपुर । विश्व सुन्दरी प्रतियोगिताको आयोजक संस्थाका अध्यक्ष जुलिया मोर्लेले मकवानपुरको विकट चेपाङबस्तीमा पूर्वमिस नेपाल शृङ्खला खतिवडाको पहलमा निर्मित स्वास्थ्यचौकीमा प्रसूति केन्द्र सञ्चालन गर्न आर्थिक सहयोग गर्ने प्रतिबद्धता गर्नुभएको छ ।
शुक्रबार सोही स्वास्थ्यचौकीमा पुगेर अध्यक्ष मोर्लेले उक्त प्रतिबद्धता व्यक्त गर्नुभएको हो । अध्यक्ष मोर्लेले २०१८ को मिस वल्र्डमा ‘ब्युटी विथ पर्पज’ जित्न सफल भएको संरचना हेर्न पाउँदा खुशी लागेको उल्लेख गर्नुभयो । यस्तो विकट स्थानमा समेत राम्रो संरचना बनेको र यस्तो ठाउँमा पुग्न र देख्न पाउँदा खुशी लागेको उहाँको भनाइ थियो ।
पूर्वमिस नेपाल खतिवडाको पहलमा निर्मित स्वास्थ्यचौकी तथा चेपाङबस्ती हेर्न विश्व सुन्दरीलगायतको टोली कैलाश गाउँपालिकाको भार्तास्थित चेपाङ गाउँमा आएको हो । तामलाङस्थित ङिको स्वास्थ्यचौकीको अवलोकनका लागि मिस वर्ल्ड टोनी एन सिंह, मिस वर्ल्डकी अध्यक्ष जुलिया मोर्ले, पूर्र्वमिस नेपाल खतिवडा, मिस नेपाल अनुष्का श्रेष्ठलगायतको टोली पुगेको थियो । मिस नेपाल २०१८ कि विजेता शृङ्खला खतिवडाले तामलाङमा ङिको स्वास्थ्यचौकी निर्माण गर्नुभएको थियो ।
मिस वल्ड प्रतियोगितामा नेपालका तर्फबाट प्रतिनिधित्व गर्नुभएकी खतिवडाले ब्युटी अफ पर्पज विधा जित्न सफल भएको स्वास्थ्यचौकी मिस वर्ल्डका आयोजकलाई अवलोकन गराउनुभएको हो । कार्यक्रममा पूर्वमिस नेपाल खतिवडाले मेहनत गरेर निर्माण गरिएको स्वास्थ्यचौकीको कामको मूल्याङ्कन भएको बताउनुभयो । एउटा ‘टाइटल’ जित्न सहयोग गरेको स्वास्थ्यचौकी निर्माणपश्चात् अवलोकनमा आएको टोलीलाई उहाँले धन्यवादसमेत व्यक्त गर्नुभयो ।