उषा आचार्य | साहित्य | फाल्गुन २४, २०७६
बा
बरु टुनीले वर्षैपिच्छे बोक्रा फेर्छ
ढुकुरले पटक पटक जोडी फेर्छ
सबैको जुनी फेरिन्छ बा
म देखिरहेछु
हजुरको च्यातिएको छाला
वर्षौंदेखि उस्तै छ
कहिले फेर्नुहुन्छ ?
बा कति लोभी हुनुहुन्छ ?
भन्नुहोस् छालाको मूल्य कति छ ?
न गरा गहिराउँदा गहिराउँदै हजुरकै जीवन गहिराइदिने
हलोको फालीले बताउन सक्यो
न त हजुरको फाटेको कुर्कुच्चामा
प्याट्टप्याट्ट पिट्ने चप्पलले भन्न सक्यो
न त खेतका कान्लामा
मुसाका दुला टालिएझैँ टालिएका
लुगाले बताउन सक्यो
त्यसैले बा
हजुर नै बताउनुहोस् न
छालाको मुल्य कति छ ?
बा
म पर्खिरहेछु
तपाईंको फेरिएको छाला हेर्न
सायद छालासँगै जीवन पनि फेरिन्छ कि ?
तर अहँ,
बरु टुनीले वर्षैपिच्छे बोक्रा फेर्छ
ढुकुरले पटक पटक जोडी फेर्छ
सबैको जुनी फेरिन्छ बा
म देखिरहेछु
हजुरको च्यातिएको छाला
वर्षौंदेखि उस्तै छ
कहिले फेर्नुहुन्छ ?