लोकसंवाद संवाददाता | स्वास्थ्य | चैत्र ४, २०७६
नेपालगञ्ज । विश्वव्यापी महामारी बनेको कोरोना भाइरसविरुद्ध पूर्वतयारी अपनाउँदै बाँकेमा टास्कफोर्स गठन गरिएको छ । नेपालगञ्ज उपमहानगरपालिकाको आयोजनामा आज बसेको सरोकारपक्षको समन्वयात्मक बैठकले प्रमुख जिल्ला अधिकारी कुमारबहादुर खड्काको संयोजकत्वमा टास्कफोर्स र व्यवस्थापन समिति गठन गरेको हो ।
बैठकले नगरप्रमुख डा धवलशम्शेर राणाको संयोजकत्वमा आकस्मिक कोष व्यवस्थापन समिति, भेरी अस्पतालका प्रमुख डा प्रकाश थापाको संयोजकत्वमा मेडिकल समिति र स्वास्थ्य कार्यालय बाँकेका प्रमुख धीरजङ्ग शाहको संयोजकत्वमा रोकथाम तथा नियन्त्रण समिति गठन गरेको छ ।
बैठकमा कोरोना भाइरसविरुद्ध पूर्वतयारीका लागि आकस्मिक कोषमा नेपालगञ्ज उपमहानगरपालिकाको तर्फ बाट ३० लाख रुपैयाँ, बाँके जिल्ला समन्वय समितिले ३० लाख रुपैयाँ, कोहलपुर नगरपालिकाले २० लाख रूपैयाँ, छ वटा गाउँपालिकाले १०/१० लाख रुपैयाँ र नेपालगञ्ज उद्योग वाणिज्य सङ्घले २० लाख रुपैयाँ सहयोग गर्ने निर्णय भएको छ ।