तिमीलाई...
चैत्र ८, २०७६

यात्रा हो जिन्दगी भन्छ्यौ भने 
हिँड्नु मन नथाकुन्जेल हिँड्नु 
म बाटो बनेर छाती थापिदिनेछु ।

गन्तव्य हो जिन्दगी भन्छ्यौ भने 
चुम्नु सफलताका हरेक शिखरहरू 
म साहस बनेर उभिइदिनेछु ।

विश्राम हो जिन्दगी भन्छ्यौ भने 
आऊ धित मरुन्जेल बस
म चौतारो बनिदिनेछु ।

म बाटो हुनु 
म साहस हुनु
म चौतारो हुनु 
र, तिमी नहुनु निरर्थक छ ।

समयको आँधीले उडाई ल्याएको 
जिन्दगीको बाढीले बगाई ल्याएको
कयौं दोबाटोहरूमा देखेर पनि नबोलेका
हजारौँ बाटाहरूमा ठोक्किएर पनि नदेखिएका 
तिमी र म आखिर हामी रहेछौँ ।

केही नमिलेर सबथोक मिल्छ हाम्रो 
सबथोक मिलेर केही नमिलेको हुँदैन हाम्रो ।

तिमी फूल मनपराउँछ्यौ, म काँडा 
म समथर मनपराउँछु, तिमी डाँडा 
त्यसैले त हामी पूर्ण छौँ ।

हामीलाई गर्नु छैन रोमियो जुलियटको जस्तो प्रेम 
हामीलाई बनाउनु छैन सम्झनाको ताज महल 
हामीलाई खन्नु छैन वियोगमा कुनै पोखरी 
बिछोडिएर अमर बाँच्ने कुनै रहर छैन हाम्रो ।

आऊ यस्तो प्रेम गरौँ दुनियाँलाई गर्व होस्
हाम्रो माया बसेको दिन भविष्यमा पर्व होस् ।


अधिकारी नेपाली कविता साहित्यमा सशक्त कलम चलाउनुहुन्छ ।