लोकसंवाद संवाददाता | साहित्य | बैशाख १०, २०७७
काठमाडौँ । नेपाल प्रज्ञा–प्रतिष्ठानले राष्ट्रिय कविता महोत्सव–२०७७ का लागि कविता आव्हान गरेको छ । असार ९ गते प्रज्ञा–प्र्रतिष्ठानको ६३ औँ वार्षिक उत्सवका अवसरमा प्रज्ञा भवन, कमलादीमा आयोजना गरिने राष्ट्रिय कविता महोत्सवका लागि सूचना जारी गरी प्रज्ञा–प्रतिष्ठानले कविहरूबाट कविता आव्हान गरेको हो । प्रज्ञा–प्रतिष्ठानले जारी गरेको सूचनाअनुसार इच्छुक कविहरूले समसामयिक विषयमा लेखिएका १५० शब्दसम्मका कविता जेठ २५ गतेभित्र बुझाउन सक्नेछन् ।
सदस्य सचिव प्राध्यापक जगत्प्रसाद उपाध्यायले महोत्सवका लागि बुझाइने कविता पूर्णतः मौलिक हुनुपर्ने र महोत्सव सम्पन्न नभएसम्म कुनै पनि विद्युतीय वा छापा माध्यममा प्रकाशन एवम् प्रसारण गर्न नपाइने बताए । उनले कविताका साथमा कविले आफ्नो फोटो, पूरा ठेगाना, फोन वा मोबाइल नम्बर र इमेल ठेगाना अनिवार्य रूपमा उल्लेख गर्नुपर्ने जानकारी गराए ।
काव्य विभाग प्रमुख प्रा.डा. हेमनाथ पौडेलका अनुसार कविता महोत्सवमा प्रथम हुनेलाई स्वर्णपदकसहित नगद ३० हजार, द्वितीय हुनेलाई रजत पदकसहित नगद २५ हजार र तृतीय हुने तीन जनालाई जनही काँस्यपदकसहित नगद २० हजारका दरले सम्मानपत्रसहित पुरस्कार प्रदान गरिनेछ । कविहरूले आफ्नो कविता प्रीति फन्टमा टाइप गरी kabitamahotsab2077@gmail.com इमेल गर्न सक्नेछन् । नेपाल प्रज्ञा–प्रतिष्ठानको इतिहासमा वि।सं। २०२२ सालबाट राष्ट्रिय कविता महोत्सव आम्भ भएको हो ।