वासुदेव अधिकारी | साहित्य | असार १३, २०७७
प्रिय बन्दाबन्दी,
आफूलाई छाम्दैछु
आफैँलाई हेर्दैछु
विगतसँग बात मार्दैछु
संसार बनाउन
मुलुक सपार्न
अरुलाई कति गाली गरेँ ?
आफूले कति काम गरेँ ?
एक एक जोखिरहेछु
एक एक हिसाब निकालिरहेछु
जंगल जानेहरुले जंगल फाँडे
नदी पस्नेहरुले वालुवा चोरे
कानुन लाग्ला तिनलाई
सिंहासन बस्ने /ताक्नेले
सपना तुहाए
सपना कुहाए
इतिहास जाइलाग्ला तिनलाई
घरै बस्ने मैले
साग मूला तुलसी रोपेँ ?
बाबरी वा पुदिना लगाएँ ?
प्याज महंगियो भनेर
किन रोएको म हिजो ?
विषादिमा राष्ट्रियता
किन खोजेको मैले हिजो ?
बन्दाबन्दीमा
आफैँलाई प्रश्न गरिरहेछु
आफ्नै स्कोर हेरिरहेछु ।