खेलकुद सङ्घलाई एन्टी डोपिङ नियम निर्देशन

खेलकुद सङ्घलाई एन्टी डोपिङ नियम निर्देशन

लोकसंवाद संवाददाता  |  खेलकुद  |  असार २५, २०७७

काठमाडाैँ । नेपाल ओलम्पिक कमिटी (एनओसी)ले आफ्नो मातहतका २७ राष्ट्रिय खेलकुद सङ्घलाई आफ्नै एन्टी डोपिङ नियम बनाउन निर्देशन दिएको छ ।

भिडियो कन्फरेन्समार्फत २०७७ असार २४ गते बुधबार सङ्घका पदाधिकारीसित भएको छलफलमा एनओसीले उक्त निर्देशन दिएको हो । सङ्घहरुलाई आगामी साउन मसान्तसम्म एन्टी डोपिङ नियम बनाएर प्रतिवेदन नेपाल एन्टी डोपिङमा बुझाउन एनओसीले निर्देशन दिएको छ । सन् २०२१ पछि एन्टी डोपिङ नियम नभएको सङ्घले अन्तर्राष्ट्रिय प्रतियोगिता खेल्न नपाउने नियम छ ।

एनओसीका अध्यक्ष जीवनराम श्रेष्ठले उक्त नियमलाई सकारात्मक र गम्भीर रुपमा लिनुपर्ने बताउनुभयो । एनओसीका महासचिव निलेन्द्रराज श्रेष्ठले एन्टी डोपिङ नियम बनाउन सङ्घलाई सहयोग गर्ने बताउनुभयो । छलफलमा एनओसीमा आबद्ध २७ खेलकुद सङ्घका पदाधिकारीको सहभागिता थियो ।

सो अवसरमा कमिटीका मेडिकल कमिसन प्रमुख सरोजकृष्ण श्रेष्ठले सङ्घका सबै अध्यक्ष र महासचिवलाई नयाँ नियमबारे जानकारी गराउनुभएको थियो । सन् २०२१ को विश्व एन्टी डोपिङ कोडको आर्टिकल १८ अनुसार सबै खेल सङ्घले आफ्नो एन्टी डोपिङ नियम बनाउनुपर्ने उल्लेख छ ।