लोकसंवाद संवाददाता | समाज | श्रावण १४, २०७७
दाङ । दाङमा पहिराले पुरिएर आमाछोरीको मृत्यु भएको छ । बङ्गलाचुली गाउँपालिका–५ साकिने भन्ने स्थानमा आज बिहान करीब ३ः०० बजे घरमाथि बाट खसेको पहिराले घर पुरिँदा उनीहरुको मृत्यु भएको गाउँपालिका अध्यक्ष भक्तबहादुर वलीले जानकारी दिनुभयो ।
घरमाथि बाट खसेको पहिराले पुर्दा साकिनेकी २४ वर्षीया बाटुली नेपाली र उहाँकी दुई वर्षीया छोरी आयुष्मा नेपालीको मृत्यु भएको गाउँपालिका अध्यक्ष वलीले पुष्टि गर्नुभएको छ । घरमा रहेका पाँच जनामध्ये अन्य तीनजना भने सकुशल रहेका छन् । सो घरमा मृतक बाटुकीका सासू, ससुरा र जेठाजु बस्दै आउनुभएको थियो । मृतकका श्रीमान्को केही समयअघि मृत्यु भइसकेको बताइएको छ ।
घोराही बजारबाट करीब ३७ किलोमिटर पूर्व उत्तरमा सो घटना भएको हो । बङ्गलाचुली गाउँपालिका पहाडी भेग भएकाले सो स्थानका अधिकांश बस्ती अहिले पनि पहिराको उच्च जोखिममा रहेका छन् । केही दिनयताको लगातारको बर्सातका कारण बङ्गलाचुलीका अधिकांश स्थानका बस्ती पहिराको उच्च जोखिममा परेका हुन् ।