साहित्यकार ज्ञवालीको ‘बुद्धिको पाइला’ सार्वजनिक
श्रावण २६, २०७७

काठमाडौँ । साहित्यकार ज्ञाननिष्ठ ज्ञवालीको छन्द कविता सङ्ग्रह ‘बुद्धिको पाइला’ सार्वजनिक गरिएको छ । ज्ञवालीको यो १८औँ कृति हो ।  यसअघि उहाँका ‘आख्यानकार विश्वेश्वरप्रसाद कोइराला’, ‘शाकुन्तल महाकाव्यमा पूर्वीय दर्शन’, ‘समालोचना पुष्प’, ‘भूमिकाको भूमिका’लगायत कृति प्रकाशन भइसकेका छन् । 

भर्चुअल माध्यमबाट हरेक पल डट कमले आयोजना गरेको कार्यक्रममा लेखक ज्ञवाली, साहित्यकार डा शैलेन्दुप्रकाश नेपाल, कवि ऋषभदेव घिमिरे, कवयित्री रञ्जना निरौलाले संयुक्तरुपमा कृति लोकार्पण गर्नुभएको हो । 

कार्यक्रममा कृतिमाथि समीक्षा गर्दै साहित्यकार नेपालले राष्ट्रप्रेमको भाव बोकेको शास्त्रीय छन्दमा रचित कृतिले छन्द कविता परम्परालाई संरक्षणमा योगदान गर्ने बताउनुभयो । सो अवसरमा कृतिका बारेमा कवि एवं कवयित्री घिमिरे, निरौला, लेखक ज्ञवालीलगायतले  नयाँ पुस्तालाई छन्दमा कविता लेख्न यस्ता पुस्तकले प्रेरित गर्ने विचार राख्नुभयो ।

उपजाति, शार्दूलविक्रीडितलगायत नौ  छन्दमा लेखिएको कृतिमा ८० पृष्ठ छ । सविता भट्टराईले प्रकाशन गर्नुभएको कृति नेपाली नागरिकले पढ्न चाहेमा निःशुल्क उपलब्ध गराइने कवि ज्ञवालीले राससलाई जानकारी दिनुभयो । विदेशीलाई भने ११ डलर मूल्य तोकिएको छ । यसअघि ज्ञवालीले विभिन्न विधाका दर्जनौं कृतिको सम्पादन र भूमिका लेखनसमेत गरिसक्नुभएको छ । विधागतरुपमा समालोचनाका चार,निबन्ध एक, बाल साहित्य एक दर्जन, भाषणकलाको एक, भूमिकाको भूमिका एकलगायत कृति सार्वजनिक भइसकेका छन् ।