रवीन्द्र आनन्द | समाज | बैशाख १४, २०७६
सिंढी चढिरहने जोशको पनि नशा लाग्दोरैछ
मान्छेले मान्छेलाई बिर्सिने दशा लाग्दोरैछ ।
सम्वन्धको नेटवर्कमा भाइरस लागेपछि
मान्छेको तस्विर धमिलिने दशा लाग्दोरैछ ।
दिनरात मायाको न्यानो राप नपाएपछि
उखुको रसपनि अमिलिने दशा लाग्दोरैछ ।
आफ्नाहरु सबै मुटुमा जम्न लागेपछि
निचोरिएर आँखाबाट बग्ने दशा लाग्दोरैछ ।
हिऊँझैं भएर कठोर जम्न लागेपछि
घामै पनि लुखुरलुखुर हिड्ने दशा लाग्दोरैछ ।