न्युज कारखाना | खेलकुद | आश्विन १८, २०७८
साफ च्याम्पियनसिपको दोस्रो खेलमा सोमबार नेपालले श्रीलंकाको सामना गर्दै छ । मालेस्थित राष्ट्रिय रंगशालामा हुने खेल नेपाली समयअनुसार रातको पौने १० बजे सुरु हुनेछ । नेपाल र श्रीलंकाबीच हुने खेलमा २ जना यस्ता खेलाडी छन्, जसले पूरा समय मैदानमा आफ्नो प्रभाव छाड्न सक्छन् ।
तेज तामाङ : नेपाल
होल्डिङ मिडफिल्डरमा होस् या अट्याक लाइनमा तेज तामाङले पाएको भूमिका सहजै निर्वाह गर्ने गर्छन् । उमेरले २३ मात्र लागेका तेज नेपाली टोलीको मुख्य हतियार भइसकेका छन् । प्रशिक्षक अब्दुल्लाह अल्मुताईरीले तेजलाई आवश्यकताअनुसार होल्डिङ र आक्रमण दुवैको भूमिकामा खेलाउँदै आएका छन् ।
गत महिना भारतसँगको मैत्रीपूर्ण खेलमा तेजले बक्स बाहिरबाट गरेको गोलले खुबै चर्चा पायो । त्यो गोल नै तेजको राष्ट्रिय टोलीका लागि पहिलो गोल थियो ।
व्यावसायिक फुटबलमा विभागीय नेपाल पुलिस क्लबमा रहेका तेज एन्फा एकेडेमीका उत्पादन हुन् । उमेर समूहमा समेत तेजको भूमिका उस्तै रहने गर्थ्यो । तेजले भारतविरुद्ध यू- १९ टोलीबाट गरेको गोलकै कारण नेपालले उपाधि हात पार्न सफल भएको थियो । होल्डिङ र अट्याकसँगै लामा प्रहार र आफ्नो बक्ससम्म आएर रक्षा गर्न सक्ने तेज पूरा श्रीलंकाली टोलीका लागि टाउको दुखाइको विषय बन्न सक्छन् ।
डिलन डी सिल्भा : श्रीलंका
श्रीलंकाली टोलीबाट १० नम्बर लगाएर खेल्ने खेलाडी हुन्, डिलोन डी सिल्भा । युवा खेलाडी डी सिल्भाले साफको पहिलो खेलमा बंगलादेशविरुद्ध ६२ मिनेटमा वैकल्पिक खेलाडीका रूपमा मैदान प्रवेश गरेका थिए । यी १९ वर्षीय श्रीलंकाली अट्याकिङ मिडफिल्डर युरोपेली क्लबबाट व्यावसायिक फुटबल खेल्ने गर्छन् । हाल डी सिल्भा क्विन्स पार्क रेन्जर्स (क्विपीआर)को यू- २३ टोलीबाट खेल्दै आएका छन् । क्विपीआरमा भने सिल्भाले विंगरको भूमिका निर्वाह गर्छन् ।
पहिलो खेलमा बंगलादेशविरुद्ध दोस्रो हाफमा मैदान प्रवेश गरे पनि सिल्भाले आफ्नो प्रभाव जमाएका थिए । इंग्लिस क्लब टोटनहमको उमेर समूहबाट समेत खेलिसकेका डी सिल्भा मिडलाइनमा आफ्नो भूमिका सहजै निभाएर अट्याक लाइनमा नेपाली डिफेन्डरका लागि भारी पर्न सक्छन् । नेपालविरुद्धको खेल डी सिल्भाका लागि राष्ट्रिय टोलीबाट चौथो खेल हुनेछ ।