नेपालको आन्तरिक हवाई उडानमा अहिलेसम्मकै सबैभन्दा ठूलो हवाई दुर्घटना भएको छ । यो दुर्घटनामा ६८ जना यात्रु र ४ जना चालक दलका सदस्य थिए । विमान दुर्घटनामा सबैको मृत्यु भएको छ । हवाई सुरक्षाका दृष्टिकोणले नेपाली आकाश निकै असुरक्षित मानिन्छ । हालसम्म नेपाली आकाशमा १०४ वटा हवाई दुर्घटना भएका छन् ।
२०१२ वैशाखमा बाराको सिमरामा भारतको कलिंगा एयर दुर्घटना हुँदा दुई जनाको मृत्यु भएको थियो । नेपालको आन्तरिक उडानतर्फ आइतबार ५०औं दुर्घटना भएको छ ।
नेपाल नागरिक उड्डयन प्राधिकरणको ‘एभीएसन सेफ्टी रिपोर्ट’ अनुसार नेपालमा हालसम्म एक इन्जिन युक्त आठ वटा विमान दुर्घटना भएका छन् भने ३६ वटा हेलिकोप्टर र विदेशी १० वटा वायुसेवासमेत गरी हालसम्म १ सय ४ वटा दुर्घटना भइसकेका छन् । नेपालमा हवाई दुर्घटनामा ९ सय भन्दा बढीले ज्यान गुमाएका छन् ।
आन्तरिकतर्फ ३ सय ६४, सिंगल इन्जिन भएका विमान दुर्घटनामा २५, हेलिकप्टर दुर्घटनामा ८५ र विदेशी वायुसेवातर्फ ३ सय ७५ जनाको मृत्यु भएको छ । आइतबार भएको दुर्घटनामा ६८ जनाको मृत्यु भइसकेको छ भने थप चार जना पनि जिवित भेटिने सम्भावना छैन । नेपालमा विमान दुर्घटनाको रिपोर्ट हेर्ने हो भने पछिल्ला २४ वर्षमा यती एयरको १४औं एटिआर विमान दुर्घटना हो । गत जेठमा जोमसोमका लागि १९ जना यात्रु बोकेर पोखराबाट उडेको तारा एयरको टि्वनअटर विमान दुर्घटनाग्रस्त भएको थियो । यो कम्पनीसँग अब ४ वटा मात्रै एटीआर विमान बाँकी छन् ।
२००६ पछि भएका विमान दुर्घटना
सेप्टेम्बर २००६– ताप्लेजुङको घुन्सामा श्री एअरको हेलिकप्टर दुर्घटनामा पर्दा २४ जनाको मृत्यु भएको थियो । मृत्यु हुनेमा तत्कालीन वन तथा भूसंरक्षण राज्यमन्त्री गोपाल राई, संरक्षणविद् डा.हर्क गुरुङ, डा.सीबी गुरुङ, तीर्थमान मास्केलगायत
अक्टोबर २००८– लुक्ला विमानस्थलमा अवतरण गर्नुअघि भएको दुर्घटनामा १८ जनाको मृत्यु, एक जना घाइते
अगस्ट २०१०– काठमाडौंबाट लुक्लातर्फ उडेको विमान दुर्घटना हुँदा १४ जनाको मृत्यु
डिसेम्बर २०१०– खोटाङको लामीडाँडाबाट काठमाडौं उडेको विमान ओखलढुङ्गामा दुर्घटनामा पर्दा १९ यात्री र चालक दलका तीन सदस्यको मृत्यु
सेप्टेम्बर २०११– माउन्टेन फ्लाइटका लागि उडेको बुद्ध एअरको विमान काठमाडौं नजिकै कोतडाँडामा दुर्घटनाग्रस्त हुँदा नेपाली, भारतीयसहित १४ जनाको मृत्यु
मे २०१२– भारतीय तीर्थयात्री बोकेर पोखराबाट जोमसोम उडेको अग्नि एअरको विमान जोमसोम विमानस्थलनजिकै दुर्घटना हुँदा १९ जनाको मृत्यु
सेप्टेम्बर २०१२ – काठमाडौंबाट लुक्ला उडेको सीता एअरको विमान त्रिभुवन अन्तर्राष्ट्रिय विमानस्थलनजिकै दुर्घटना हुँदा १९ जनाको मृत्यु
फेब्रुअरी २०१४– पोखराबाट जुम्ला उडेको नेपाल वायुसेवा निगमको विमान अर्घाखाँचीमा दुर्घटनाग्रस्त हुँदा १८ जनाको मृत्यु
मार्च २०१५– त्रिभुवन अन्तर्राष्ट्रिय विमानस्थलमा हुस्सुका कारण टर्किश एअरको विमान धावन मार्गबाट चिप्लिएर दुर्घटना
जुन २०१५ – सिन्धुपाल्चोकमा भूकम्पको राहत तथा उद्धारमा गएको डक्टर्स विदाउट बोर्डसले चार्टर गरेको हेलिकप्टर दुर्घटना हुँदा चार जनाको मृत्यु
मे २०१५– भूकम्पपछिको राहत तथा उद्धारकार्यमा खटिएको अमेरिकी सेनाको हेलिकप्टर चरीकोटनजिकै दुर्घटनाग्रस्त, छ अमेरिकी सैनिक, दुई नेपाली सेनाका अधिकारी र पाँच सर्वसाधारणको मृत्यु
फेब्रुअरी २०१६– पोखराबाट जोमसोम उडेको तारा एअरको विमान दुर्घटनाग्रस्त हुँदा २३ जनाको मृत्यु
मार्च २०१८– बंगलादेशबाट नेपाल आएको यूएस–बाङ्ग्ला एअरलाइन्सको विमान त्रिभुवन अन्तर्राष्ट्रिय विमानस्थलमा दुर्घटनाग्रस्त, ५१ जनाको मृत्यु
सेप्टेम्बर २०१८– गोर्खाबाट काठमाडौं आउँदै गरेको एल्टिट्यूड एअरको हेलिकप्टर धादिङ र नुवाकोटबीच रहेको एउटा जङ्गलमा दुर्घटनाग्रस्त, एक जापानी पर्यटक र अन्य पाँच जनाको मृत्यु
फेब्रुअरी २०१९– एअर डाइनेस्टीको हेलिकप्टर ताप्लेजुङमा पाथीभरानजिकै दुर्घटनामा पर्दा तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सात जनाको मृत्यु
एप्रिल २०१९– सोलुखुम्बुको लुक्ला विमानस्थलमा समिट एयरको एउटा विमान धावनमार्गको छेउमा रहेका दुईवटा हेलिकप्टरमा गएर ठोकिँदा तीन जनाको मृत्यु
मे २०२२– पोखराबाट जोमसोमका लागि उडेको एअरको यात्रुवाहक ट्विनअटर ढल्ब्भ्त् विमान दुर्घटनामा पर्दा २२ जनाको मृत्यु
१५ जनवरी, २०२३– काठमाडौंबाट पोखराका लागि उडेको यती एयरलाइन्सको विमान पोखरा विमानस्थलमा अवतरण गर्नुअघि सेती नदीमा खसेर दुर्घटना हुँदा ६८ जनाको मृत्यु, चार जनाको खोजी जारी
नागरिक उड्डयन प्राधिकरणका अनुसार विमानमा ६८ यात्रुमध्ये ५३ जना नेपाली र अन्य विदेशी थिए । यती एयरलाइन्सका अनुसार विमानमा भएका ७२ जनामध्ये ३७ पुरुष र २५ महिला, तीन बालक र तीन शिशु थिए । हालसम्म एक शिशुको मृत्यु भएको प्राधिकरणले पुष्टि गरेको छ ।
विमानमा ५३ जना नेपाली, ५ जना भारतीय, ४ जना रुसी, २ जना कोरियाली, १ जना आइरिश, १ जना अस्ट्रेलियाली, १ जना अर्जेन्टिनी र १ जना फ्रान्सेली नागरिक थिए ।
आइतवार साँझसम्म मृतकमध्ये २४ जनाको सनाखत भएको छ । अस्पताल लगिएका शवको पोस्टमोर्टम परीक्षण सकेर सोमबार शव परिवारलाई बुझाउने तयारी छ ।
