डा.भोजराज घिमिरे | साहित्य | चैत्र ११, २०७९
हरदम म उसकै भएझैँ गर्छ
पैसाले यो मन किनेझैँ गर्छ !
टुक्री कलेजो गएझैँ बाबु
टीका रगतले मुछेझैँ गर्छ !
हरप्रश्नले हरव्यथाको उत्तर
तिम्रो नजरमा दिएझैँ गर्छ !
देखेर हर्कत हृदयको हरदम
एक ठाउँ धड्कन रुकेझैँ गर्छ !
हेर्दै छ चुपचाप त्यो टोलाई
ईश्वर शिला भै दुखेझैँ गर्छ !
कसरी म बाधूँ रहर दाम्लोले
गोठको बाछो फुकेझैँ गर्छ !
आरिस गरी भीरले गाडीको
हरदम सडकमा कुदेझैँ गर्छ !
रेट्ने कि गिँड्ने अचानोमाथि
खुकुरीले गर्दन पुजेझैँ गर्छ !
के हात छाड्यौ तिमीले मेरो
बैसाखी आफैँ टुटेझैँ गर्छ !
देखेर बैँसालु चङ्गा उड्दो
बेलुन भई मन उडेझैँ गर्छ !
केही समय प्यास के टाढा भो,
हरदम नदी फन्किएझैँ गर्छ !
डुङ्गा किनारा बनेको देख्छु
सागरले पीडा बुझेझैँ गर्छ !