ऋतु आशिक | साहित्य | भदौ ३०, २०८०
बाँचुञ्जेल पार्टीका लठेत गुण्डाहरूको भीड बोकेर
तिम्रो मनोगत स्वार्थको चाका चुलीमा
देश यसबेला अस्थिर र जर्जर
देश नै हराउने स्थितिबाट गुज्रिरहेको छ ।
देश माथि घात माथि घात गरेउ
कम्युनिष्टको रामनामी बर्को ओढेर
गठबन्धनको मधुमास मनायौं ।
कहिले काँग्रेससँगै
कहिले माओवादीको खोल ओढेर
छिमेकीको उक्साहटमा
मेरो देश आर्थिक क्रान्तिको छलाङ मारिरहेको थियो ।
कलकारखाना कवाडीमा बेचिरहेका थियौं ।
देशमा लुटान मच्चाएर,
देशप्रति घात गरिरहेका थियौं ।
ती लुटान अझै जारी छ ।
तिम्रो लुटको मृत्यु विजयोत्सवमा
म तिम्रो मृत्युमा मलाम जान सक्दिनँ ।
मलाम भनेको सन्मान गर्नु हो ।
म तिमीलाई देशद्रोहीको रुपमा घृणा गर्छु ।
मेरो अन्तर आत्माले जान मान्दैन ।
देशलाई माया गर्ने लर्कोमा म एक्लै हुन सक्छु ।
हो ! यो तिम्रो विरोधमा एक्लै हुन सक्छु ।
जीवन भरि तिमीले र तिम्रो पार्टीले गरेको देश घात
तिमीलाई चोख्याउन मनले मान्दैन ।
तिमीलाई चोख्याउन मैले मलामी जानु हुँदैन ।
कतै अमेरिकी कलेवरमा
कतै भारतीय कलेवरमा
एम.सी.सी.मा डामिएका पार्टीहरू
देश माथि सिक्किम थोपरिएका छन् ।
लेण्डुपेले सिक्किम सुध्याएर उत्तानो परेको थियो ।
एमाले, काँग्रेस माओवादी अन्य देशद्रोही पार्टीहरू
सिक्किमको पुनरावृत्तिको नौटङ्की गरिरहेका छन् ।
महाकाली सन्धिदेखि
धेरै खोला नाला बेची खाएको
तिम्रो ल्याप्चे अझै ताजा छ ।
देश तिमीहरूकै डकैतीका कारण
ठगिँदै – ठगिँदै सकिनु पर्ने
तिमीहरूकै कारण देश तुहिनु पर्ने
तिम्रो देश घातको श्रृङ्खलामा
पार्टी–पार्टी हुँदै
देश सिक्किममा परिवर्तित हुँदै छ ।
बुझ्दा बुझ्दै पनि –
तिमी देशद्रोही, तिमी देशघातकी हुँदाहुँदै
तिम्रो मृत्युमा –
मेरो देशको झण्डा ओढाउनु पर्ने ।
देश घातकीहरूको सन्मानमा
हामीले सन्मान पस्किनु पर्ने ।
भयो – भयो – अति भयो
तिम्रो देश घातका विरुद्ध घृणित कार्य खोतल्दै
तिम्रो देशद्रोहीका विरुद्ध
कालो झण्डा आकाशतिर उठाउँछु ।
आकाशतिर चर्किने आवाजमा भन्छु –
म देशद्रोहीको सम्मानमा मलाम जान सक्दिनँ ।
जीवनभरि देश घात गर्ने
मरेपछि श्रद्धाञ्जली
महानता खोज्ने
मबाट यो दोहोरो चरित्र हुन सक्तैन ।
तिमी देशद्रोही हौं
तिम्रो सन्मानमा मेरो शिर झुक्न जानेको छैन ।
देशप्रति तिमीले गरेको गद्दारीमा
म तिमीलाई थुक्दै घृणा भावमा भन्छु
म देशद्रोहीको मलामी जान सक्दिनँ ।
हो ! म तिमीलाई घृणा गर्छु
यसैले म तिम्रो मलामी जान सक्दिनँ ।
२६ भाद्र २०८०
आपगाछी, तरहरा, इटहरी