चिरन ‘चिदानन्द’ | साहित्य | भदौ १३, २०७७
सुनेको थिए
भूगोलको घेराले जोडेको सम्बन्ध भन्दा
मनको समिप्यताले जोडेको सम्बन्ध नजिक हुन्छ रे
कोहि जोड्दै थिए
सभ्यता र संस्कृतिका तहमा भएका सम्बन्धको स्मरण
बुलन्द आवाजमा कोहि कुर्लिय
समयसंगै सम्बन्धको परिभाषा फेरिन्छ रे
ऊ द्रष्टा भएर हेरिरह्यो
भूराजनीतिक धरातलमा आएका भूकम्पका धक्काहरु
भाग्नाबशेष झुपडीका आँशुका कथाहरु
धम्कीले लुछिएर लगिएका उस्का गराका पाटाहरु
तैपनि सधै दोहरी रह्यो निकट सम्बन्धका गीतहरु
ऊ झस्किन्छ
बेबारिसे अवस्थामा फालिएको सम्बन्ध जुर्मुराएछ
सम्बन्धले थिचिएको एउटा अटुट सम्बन्ध
लाज लुकाउन जोडिएको फेरी एउटा सम्बन्ध
धेरै भो अब त शब्दहरुमा जकड़ीएर
बास्तबिकतामा बाचेको जीवन
प्रश्न मनमनै गर्छ ऊ
'पहिचान' के हो ? समयले अर्थ मागेको छ
'सम्बन्ध'के हो ? समयले परिभाषा खोजेको छ